On Behalf Of Muhammad Dafiq Saib
Sent: Tuesday, October 13, 2009 9:05 AM

Assalaamu'alaikum wa rahmatullaahi wa barakaatuhu

Alhamdulilllah, tadi malam ambo baliak dari nagari awak, sampai di rumah di Jatibening alah pukuah 10 malam.

Iko laporan singkek pajalanan ambo maantaan sumbangan pado tangal 7 -8 Oktober 2009 nan lapeh basamo-samo jo ustadz Zulharbi.

Sajak kontak jo ustadz Zulharbi katiko ambo ka barangkek, alah ado kasapakatan kami tantang kama ka pai sarato apo nan ka dibao. Sasuai jo saran dunsanak-dunsanak nan lain katiko itu, ustadz Zulharbi sarato jo umi Yusra (urang rumah baliau) manyanggupi untuak babalanjo mambali bahan sembako. Tanggal 4 katiko kami barangkek dari Jakarta ambo transfer pitih Rp 3,000,000.00 ka rekening ustadz Zulharbi. Tanggal 6 ambo antaan pulo Rp 2,000,000.00 lai. Baliau bali bareh, gulo, teh, ikan kariang, karupuak. Pitih nan ambo bao adolah sabanyak Rp 30,000,000.00, Rp 21 jt dari Masjid Al Husna dan Rp 9,000,000.00 dari kacio Rantau Net. Nan dari Rantau Net ko batambah taruih, dari Rp 7,5 juta katiko ambo pai tanggal 4, manjadi sakitar Rp 11,000,000.00 tanggal 8 Oktober pagi. Bahkan batambah juo lai sasudah kami salasai mambagikan sumbangan tanggal 8 Okt malam.

Tanggal 7 pagi kami manuju ka Patamuan di Tandikek. Ikuik pai urang rumah ambo, umi Yusra (urang rumah ustadz Zulharbi) sarato duo urang anak baliau. Kami seo bus ketek (Mitsubishi L-300). Amplop barisi rp 100,000.00 kami sadioan sabanyak 150 buah di hari partamu ko. Ado surang santri ustadz Zulharbi nan barasa dari kampuang Batang Sani di Patamuan nan maagiah informasi kondisi karusakan di kampuangno. Itu salah satu alasan kami mamuloi kunjungan ka daerah ko. Kami dijapuik dek surang anak mudo nan datang ba sapeda motor ka simpang jalan di Sicincin. Anak mudo ko nan mambao kami sampai ka Batang Sani. Satibo di sinan, anak mudoko bacarito tantang korban gampo nan alah pindah mangungsi dari rumah mareka masiang-masiang. Kabanyakan dari kampuang Cumanak jo Lubuak Laweh ka Batang Saniko.

Manuruik anak mudoko (dan nan diinginkanno) bialah awakno jo anak mudo di kampuang tu sajo nan mambagi-bagikan sumbangan sabab kalau disarahan ka Posko lambek baru ka sampai ka korban gampo dan bahkan mungkin indak marato pulo pambagian tu. Sadang kalau dibagian langsuang di tangah kampuang jo rumah-rumah nan rusak, dikhawatirkan, nan ka manarimo indaklah urang nan kamalangan tapi urang lain nan datang dari daerah lain. Baitu jano. Ambo kecek-an bahaso kami indak kamaagiahan sumbangan tu di ciek tampek sajo, dan indak kamaagiahan kacuali ka urang nan batua-batua korban, nampak rumahno nan rusak dan yakin bahaso iyo rumah no nan rusak tu. Kecek anak mudo tu pulo itu sulik tumah, sabab umumno urang nan punyo rumah rusak ko alah banyak nan mangungsi.

Ambo dibaono (bagonceng jo motor) mancaliak rumah-rumah nan rusak, posko di sakitar kampuang tu sarato kampuang Cumanak - Lubuak Laweh nan tarandam jo timbunan tanah. Ditanyoanno bara banyakno sumbangan nan kami bao. Masih juo no maanjurkan agar sumbangan tu dipicayoan ka ano sarato anak mudo di kampuang tu nan tau bana sia-sia nan jadi korban. Ambo indak amuah. Ambo mintak dibuek-an daftar sia sajo korban di kampuang tu atau nan mangungsi ka kampuang tu. Dibueknolah (jo bantuan santri ustadz tadi) daftar 30 urang nan tingga di kampuang tu. Kami datangi dan kami caliak kondisi rumah-rumah nan rusak tu. Dan kami sarahan sumbangan sakantong sembako jo ciek amplop.

Sudah itu kami taruihan kunjuangan ka kampuang Mudiak Balai, Lambau, Apa sarato Lubuak Laweh. Kami masuak ka tangah kampuang nan tapisah dari Posko. Di Lubuak Laweh, Bukik Bunian kami batamu jo urang-urang nan mangungsi dari kampuang Lubuak Laweh nan alah tatimbun. Basuo jo kaluarga nan salamaik tapi kahilangan anggota kalurga nan lain. Bajalan pulo kami ka pungguang bukik untuak mancaliak kampuang nan alah tatimbun tanah, hanyo sabagian ketek rumah nan masih tampak atokno sajo. Manuruik informasi ado duo ratuih urang labiah nan takubua hiduik-hiduik di kampuang tu. Bahkan ado ciek kaluarga nan sadang baralek, tingga di kampuang di ateh nan salamaik. Rumah tu sadang dipasiapkan untuak baralek, jo meja kayu di halaman rumah. Panghuni rumah tu nan sadang dalam proses baralek jo panghuni kampuang di bawah, ikuik tatimbun kasadoanno.

Di hari partamu tu kami kunjungi pulo kampuang Pondok Duo, Tanjuang, Ayia Marangek. Tapi kampuang nan paliang manyadiahkan iyo indak ado salain Lubuak Laweh. Hari tu kami bagikan 105 amplop barikuik sembako.

(disambuang baliak biko)

Wasalamu'alaikum,


Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Bekasi

On Behalf Of Muhammad Dafiq Saib
Sent: Wednesday, October 14, 2009 12:53 PM

Subject: [R@ntau-Net] Final samantaro Re: Sumbangan untuak Gampo malalui Kacio Rantau Net

Assalaamu'alaikum wa rahmatullaahi wa barakaatuhu

Laporan sampai hariko dari sumbangan gampo, nan alah ambo abihkan untuak samantaro (saldo nol). (nan sabalunko singajo indak diapuih di bawah).

Sisa yang belum disalurkan (kapatang) Rp 4,488,388.00
250,309.00 dari MS
180,309.00 dari NF

Jumlah Rp 4,919,006

Dikirim ka SMK Dhuafa di Padang nan gaduang sakolano runtuah sabagai sumbangan gampo Rp 2,000,000.00 (pangiriman basamoan jo kiriman rutin Rp 300,000.00 tiok duo bulan).

Siso Rp 2,919,006.00 dikiriman ka BCA Ephie Lintau nan ka pai mambuek bedeng ka ganti tenda tampek lalok masyarakaik korban gampo di Pariaman.

Jadi samantaro, siso sumbangan nan ambo pacik adolah NOL.

Wassalamu'alaikum,

Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Bekasi

On Behalf Of Muhammad Dafiq Saib
Subject: [R@ntau-Net] Laporan singkek maantaan sumbangan untuak korban Gampo (2)

Assalaamu'alaikum wa rahmatullaahi wa barakaatuhu

(sambungan)

Lubuak Laweh adolah carito malang nan sabana langkok. Banyak carito nan kami danga, kapadihan nan kami caliak, parasaian malang dunsanak-dunsanak nan kanai musibah. Ado nan kailangan saluruah anggota kaluarga, binyi jo anak-anak, ado nan kailangan anak duo dari barampek. Nan kailangan laki. Nan kailangan anak jo minantu. Ado nan kailangan urang tuo, ado nan patah taimpok batu, ado nan salamaik sasudah bajuang kareh malawan mauik jo caro bapacik arek-arek dima nan dapek katiko timbuan tanah mandaruang turun, ado juo nan barhasil manolong urang lain ciek jo duo. Ado bayi baumua duo bulan nan patah kaki taimpok kayu.Tapi nan labiah banyak adolah mareka nan hilang tatimbun.

Itu dari kamalangan sarato kahilangan jiwa. Alun lai dari nan kahilangan atau rumah no rusak. Dari nan tatimbun di lambah di bawah sinan, nan atokno maaram jatuah dek dindiang alah abih rarak, sampai nan sakadar dindiang rarak atau ratak-ratak.

Nan paliang manyadiahkan adolah kampuang nan tatimbun, manimbuni rumah sainggo indak tampak lai samantaro di dalamno tatimbun panduduak kampuang. Nagari nan tatimbun tu kini diadok-an mato.

Kami bajalan labiah kurang duo kilo malalui jalan mandaki manurun dari tanah lapang tampek tenda-tenda pangungsi di salo-salo rumah runtuah. Jalan kampuang nan diaspal beton sampai ka bateh nan ditutuik dek indak buliah di tampuah lai. Jalan nan alah runtuah di ujuangno. Kami maminteh ka pungguang bukik, di ateh tabiang untuk mancaliak pamandangan sabuah kampuang gadang (atau babarapo kampuang) nan tatimbun tanah pasia galodo. Tatimbun abih. Badarai ayia mato mandanga carito-carito malang tu. Badarai ayia mato mancaliak dari pungguang bukik, hamparan tanah putiah nan manutuik manimbuni kampuang. Jauah di bawah, sarupo katiko awak mancaliak ngarai Sianok dari ateh ngarai, di ujuang hamparan tanah putiah tu, tampak atok rumah jo manaro musajik nan masih tasiso. Ado escavator nan bakarajo jauah di bawah sinan, di sampiang atok rumah nan tampak tu, mungkin dalam usaho mancari mayik panghuni rumah itu agakno.

Diapuih ayia mato, dibisiak-an doa..... Allahummaghfirlahum, warhamhum, wa 'afihim, wa'fu'anhum.....

Lamo juo kami tapana mancaliak pamandangan nan mahirubirukan hati. Di tapi tabiang ado surang panduduak, indak takana di ambo namo baliau, sadang di wawancarai (malalui panterjemah) dek reporter tv Aljazeerah. Laki-laki satangah bayo nan salamaik jo caro bapacik ka dahan kayu nan masih tatagak. Kulik tanganno abih takalupeh.

Itulah ka tambah carito, sabalun kami manaruihan mambagi sumbangan di kampuang Bukik Bunian. Alah pukuah tigo siang hari. Sabanano alah taraso litak paruik. Umi Yusra mambao baka untuak makan siang kami. Hanyo tampek baranti makan nan alun basuo. Sampai kasudahanno kami baranti di surau Sungkai. Baranti makan. Sarato shalat nan dijamak.

Sasudah makan kami taruihan mambagi sumbangan di Patamuan, Pondok Duo, Tanjuang, Ayia Marangek, Barih tangah. Dicaliak bana (dipiliah) kaluarga nan ka diagiah sumbangan. Dijalehan ka mareka, bahaso kami mambao amanah dari urang rantau, jumlahno indak banyak, hanyo ka tando sato babagi pandaritaan sajo, dek karano itu indak kasadoan nan kamalangan dapek kami agiah, kami piliah nan sabana 'tadanak' bana. Alhamdulillah, masyarakaik lai faham pulo.

Hari Rabaa tanggal 7/10 tu kami sudahi mambagi sumbangan sabanyak 101 amplop (barikuik sembako). Alah lewaik wakatu maghrib katiko kami sampai di Bukiktinggi. Bisuak hari Kamih kami ka pai baliak kaarah Lubuak Basuang taruik ka Tiku - Pariaman...

(disambuang baliak biko)

Wasalamu'alaikum,


Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Bekasi

On Behalf Of Muhammad Dafiq Saib
Sent: Tuesday, October 20, 2009 9:45 PM

[R@ntau-Net] Laporan singkek maantaan sumbangan untuak korban Gampo (3)

Assalaamu'alaikum wa rahmatullaahi wa barakaatuhu

(sambungan)

Walaupun caritoko indaklah baitu paralu untuak disampaian (indak talalu manarik), tapi dek ka jadi laporan partangguang-jawaban, bialah nak ambo taruihan juo saketek lai.

Hari kamih tanggal 8 Oktober kami taruihan baliak karajo maantaan sumbangan ko. Tapi kami baduo sajo, ambo jo ustadz Zulharbi (dikawani sopir L-300 nan kami imbau Ajo). Kami barangkek pukuah satangah salapan pagi dari Gareheh, tampek ambo manginap di rumah ipa. Kami singgahi ustadz Zulharbi di Jambu Ayia. Langsunag manuju Padang Lua, bakelok ka suok, lalu di Koto Tuo taruih baliku jo mandaki manuju Matua. Taruih malalui Ambun Pagi sabalun turun di kelok 44. Baitu mamasuaki kelok, nampak pamandangan di subarang danau sabalah ka barat, banyak bana nan bopeng (takubak) pungguang bukik di sisi sabalah kian danau. Itu adolah akibaik gampo kapatang tu juo. Bukik-bukik tu banyak nan longsor.

Kami taruihan pajalanan sambia maota panjang, ota tantang pasantren kami masiang-masiang. (Ustadz Zulharbi penanggung jawab sarato pelaksana langsung pesantren Al Harbi baliau di Batusangka, ambo mauruih pulo sakola penghafal al Quran Syekh Ahmad Khatib di Koto Tuo Balai Gurah). Alah ka ilia ka mudiak ota kami samantaro oto malaju juo malalui Maninjau manuju arah ka Lubuak Basuang.

Sakitar pukuah sapuluah sampai kami di Lubuak Basuang. Langsuang tampak dek kami rumah rusak dek kanai gampo. Di kampuang nan banamo Siguguang sabalun masuak Lubuak Basung. Kami muloi baranti. Diansua karajo. Taruih kami ka Simpang Sari Manih, Banda Baru - Parik Panjang dan taruih ka Manggopoh. Sabalun Manggopoh rumah nan rusak hanyo ciek-ciek, kami maraso rumah tasisiah sarupo iko indak ka nampak dek posko, itulah sababno kami baranti. Di Manggopoh baru nampak banyak rumah nan rusak, bahkan nan runtuah samo sakali. Alah ado Posko disiko. Kami piliah bana nan ka diagiah sumbangan nan kami bao, sarupo kapatang. Taruih pulo kami ka kampuang Pandan. Disiko pun banyak rumah-rumah nan rusak. Kami masuak ka jalan ketek manuju ka arah ladang sawit dek kami danga di dalam sinan ado rumah nan runtuah.

Ado juo carito nan patuik dicaritoan di Pandan ko. Dek tau kami mambao sasuatu, basarigia juo dunsanak-dunsanak awak nan tibo. Kami tatap bahati-hati. Di ciek rumah kami tanyo sia nan punya rumah nan runtuah tu. Manunjuak surang ibu-ibu jo surang apak-apak. Tantu urang ko suami istri agakno, kecek kami. Kami agiahan sumbangan ka ibu. Nan apak manyasak pulo mamintak. Kecek kami, kan alah kami agiahan sabantako ka ibu itu. Itu iyo juo, ambo lain pulo, rumah tu baduo kami tumah, kecek no. Tapaso kami mintak maaf, sabab hanyo ciek nan kami agiah.

Di Tiku kami baistirahaik dulu untuak makan siang. Ari manjalang pukuah duo baleh.

Taruih ka Gasan Ketek di tanjuang Mutiara. Disikopun banyak rumah korban. Ado 18 urang nan mandapek amplop sumbangan.

Taruih ka Gasan Gadang sudah itu. Baru pulo ambo faham bahaso Gasan Ketek ko masuak tanjuang Mutiara talatak di kabupaten Agam. Manyubarang saketek lai, tibo kami di Gasan Gadang nan adolah bagian Padang pariaman.

Taruih ka Sungai Sariak (disiko banyak rumah rusak/runtuah). Taruih ka arah Sungai Limau, malaui kampuang Paingan, Kamumuan, Ayia Manih. Di Sungai Limau kami bakelok kakida ka arah Sungai Garinggiang. Disiko sabana parah, banyak rumah-rumah rusak dan runtuah. Banyak Posko di dalam. Ado posko nan mintak supayo sumbangan dititipan sajo ka mareka. Tapi kami indak amuah. Kami masuak ka jalan-jalan ketek dalam kampuang, basuo jo rumah-rumah rusak/runtuah di dalam. Disinan kami bagi-bagiakan sumbangan.

Di antaro rumah-rumah rusak tu ado pulo oto banomor polisi BK nan parkir di laman. Tantulah dunsanak atau anak urang punyo rumah nan pulang dari rantau.

Di dalam nagari Sungai Garinggiang dan sekitarno (sasudah babelok ka kida dari Sungai Limau) kami kitari kampuang Batu Mangaum, Lampanjang, Padang Alo. Kami baranti sumbayang di surau di kampuang Jiraik. Surau nan ratak-ratak. Masih di daerah Padang Alo, taruih ka Guguak dan sudah itu kalua baliak ka jalan gadang Tiku - Sungai Limau. Sasudah Sungai Limau, arah ka Pariaman kami lalui Sungai Sirah. Banyak pulo rumah nan rusak disiko.

Alah wakatu maghrib katiko kami masuak ka pariaman. Alah 136 buah amplop nan kami bagi sampai wakatu itu. Hanyo tingga sakitar 15 buah amplop lai dari 151 nan kami bao. Ambo ingin manyalasaian ka limo baleh nan tingga tu malam itu juo.

Di Pariaman kami agak kahilangan arah. Inda tahu bana kama ka maojok. Hari alah malam pulo. Kasudahanno kami caliak-caliak sajo di sapanjang jalan manuju ka arah pusat kota, taruih ka simpang Jaguang, manuju ka arah Sicincin. Ado juo rumah nan nyato tampak runtuah walau di hari nan alah kalam tu. Kami baranti di sampan, Toboh Mandailiang, Toboh Sikumbang. Di salah satu rumah tu, manyubarangi banda nan ado titian kayu, ambo tagurabai jatuah dek salah satu papan titian tu patah. Alhamdulillah, kacuali babeh (memar) di paho kida, itupun baru nampak bisuak harino, nan lain lai aindak baa. Di Labuah Buah kami diantaan urang lapau mancaliak rumah nan rusak runtuah di balakang jalan. Indak ado lampu panarangan dek listrik dimatian PLN. Kami tampuah jo cahayo senter dari HP. Ado surau tampek urang-urang mangungsi. Urang punyo rumah nan mangungsi ko manunjuak-an rumah mareka nan rusak jo ditarangi lampu togok. Nampak rumah-rumah nan memang iyo alah runtuah jo atok-atokno.

Salasailah karajo kami mambagi-bagikan kasadoan amplop jo sembako. Ado sabanyak 256 amplop jo nan kapatang (kapatang 105, laporan sabalunko salah tulih). Sembako langkok jo bareh sabanyak 179, nan tanpa bareh duo ratuih.

Masih ado pitih balabiah sasudah itu, nan masuak sasudah kami manyalasaian duo hari pajalanan, ambo titipan ka sanak Ephie Lintau untuak manaruihkanno. Bisuak kaambo silau pulo, mungkin masih adojuo tambahan, nan nantik ka ambo titipan pulo baliak ka dunsanak nan masih di lapangan.

Sainggo ikolah dulu laporanko. Kapado sagalo adi dunsanak nan alah mampicayoan ka kami karajoko, talabiah takurang kami mintak maaf.

Wassalamu'alaikum

Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Jatibening - Bekasi